আজিৰ দিনতো অসমীয়া বোলছবি জগতৰ বাবে এক সোণালী দিন। জয়মতী কথাছবিয়ে মুক্তি লাভ কৰাৰ যেনেদৰে গৌৰৱোজ্জল ইতিহাস তেনেদৰে জয়মতী ভূমিকাত অভিনয় কৰা প্ৰথম গৰাকী মহিলা অভিনেত্ৰী গোলাঘাট জিলাৰ আইদেউ সন্দিকৈৰ বহু ত্যাগ,কষ্ট,আদৰ্শ জড়িত হৈ আছে। কিন্তু আইদেউ সন্দিকৈৰ দৰে মহিয়সীৰ নাৰীৰ স্মৃতি যুগমীয়া কৰাৰ নামত গোলাঘাট জিলা সাহিত্য সভাই আইদেউ সন্দিকৈকে চৰম ভেঙুচালি কৰাৰ অভিযোগ উঠিছে। ১৯৯৮-৯৯ চনতে গোলাঘাট জিলা সাহিত্য সভাই আইদেউ সন্দিকৈ সাংস্কৃতিক সংগ্ৰাহালয় স্থাপনৰ প্ৰস্তাৱ গ্ৰহণ কৰি

জিলাখনৰ কমাৰগাঁও পানীদিহিঙীয়াত নিৰ্মাণ কৰে ভৱন। এই ভৱনটোৰ নামফলকখনেহে যেন আইদেউ সন্দিকৈৰ স্মৃতি ধৰি ৰাখিছে। এৰাবাৰীত পৰিণত হ’ল আইদেউ সন্দিকৈ সাংস্কৃতিক সংগ্ৰাহালয়। গোলাঘাট জিলা সাহিত্য সভাৰ তত্বাৱধানত থকা ভৱনটোত দীৰ্ঘ দিনে লাগি আছে এটা প্ৰকাণ্ড তলা। যাৰ বাবে ক্ষোভ উজাৰিলে স্থানীয় সচেতন ব্যক্তিয়ে। উল্লেখ্য যে,গোলাঘাট জিলা সাহিত্য সভাৰ বিগত কাৰ্যকালত তফজুল হকে সভাপতিৰ হিচাপে আৰু বন্তি বৰা সম্পাদকৰ পদত থাকি কাৰ্যকাল চলালে । কিন্তু এনে দিশত চুড়ান্ত দায়িত্বজ্ঞানহীনতা আৰু অৰ্কমন্যতাৰ দিশ উন্মোচিত কৰি আইদেউ সন্দিকৈ সাংস্কৃতিক সংগ্ৰাহালয় প্ৰতি যেন উদাসীন মনোভাৱহে পোষণ কৰিলে। আনহাতে গোলাঘাট জিলা সাহিত্য সভাৰ দুটাকৈ কাৰ্যকাল সম্পাদকৰ পদত থকাৰ পাছত বৰ্তমান বন্তি বৰা নামৰ

মহিলা গৰাকীয়ে গোলাঘাট জিলা সাহিত্য সভাৰ সভাপতিৰ দৰে আসন দখল কৰিবলৈও সক্ষম হৈছে যদিও চৰম অদুৰদৰ্শী ভূমিকা, দায়িত্বজ্ঞানহীনতাৰ বাবে অৱহেলিত হৈ পৰি ৰৈছে আইদেউ সন্দিকৈ সাংস্কৃতিক সংগ্ৰাহালয়। আজি গোলাঘাট জিলা সাহিত্য সভাই প্ৰতিষ্ঠা দিৱস আৰু চলচ্চিত্ৰ দিৱস পালন কৰি শিল্পীক

সম্বৰ্দ্ধনা জনাইছে। কিন্তু আইদেউ সন্দিকৈৰ দৰে প্ৰথম গৰাকী অসমীয়া মহিলা অভিনেত্ৰীক উপযুক্ত সন্মান,মৰ্যাদা দিয়াৰ অৱকাশ হ’লেহে এনে চলচ্চিত্ৰ দিৱস পালন কৰাৰ নাইবা শিল্পীক সম্বৰ্দ্ধনা জনোৱাৰ সাৰ্থকতা লাভ কৰিব বুলি ৰাইজে মন্তব্য কৰে।

গোলাঘাট জিলা সাহিত্য সভাৰ অধীনৰ মৰঙি মৌজাৰ কালিয়নী শাখা সাহিত্য সভাৰ পঞ্চদশ দ্বি- বাৰ্ষিক অধিবেশন আৰু গ্ৰন্থ উন্মোচনী সভা দিনজোৰা কাৰ্যসুচীৰে অনুষ্ঠিত হয়৷ পুৱা ৯ বজাত শাখাৰ পতাকা উত্তোলন, স্মৃতি তৰ্পণ আদি কাৰ্যসুচীৰ পিছতে ১১ বজাৰ পৰা মুকলি সভা অনুষ্ঠিত হয়৷ কালিয়নী শাখা সাহিত্য সভাৰ নৱনিৰ্বাচিত সভাপতি নীলকান্ত বৰাৰ সভাপতিত্বত অনুষ্ঠিত সভাৰ উদ্বোধন কৰে দৈগ্ৰোং শাখা সাহিত্য সভাৰ সভাপতি অৰূপ কুমাৰ দুৱৰাই৷ মুকলি সভাতে কৰবী গগৈৰ “বন্ধ খিৰিকিত বেলিৰ ছাঁ“, তিতাৰাম দাসৰ “ বাদামী সাঁজৰ ফাঁকেৰে“, বাণীকান্ত ফুকনৰ “জিজ্ঞাস“ আৰু প্ৰণামিকা দত্তৰ দুখন গ্ৰন্থ ” অনিৰূদ্ধ যাত্ৰা“ আৰু “মোৰ কিছু অনুভৱ“সহ পাঁচখনকৈ গ্ৰন্থ উন্মোচন কৰে৷ নুমলীগড় শোধনাগাৰ শাখা সাহিত্য সভাৰ সভাপতি ড° কাজল শইকীয়া, অংকুৰণ শাখা সাহিত্য সভাৰ সভাপতি জীৱন শইকীয়া আৰু ময়ুৰী বৰাই গ্ৰন্থ কেইখন উন্মোচন কৰে৷ সভাত গোলাঘাট জিলা সাহিত্য সভাৰ নৱনিৰ্বাচিত সভাপতি বন্তি বৰা, সম্পাদক দুলাল দাস, প্ৰাক্তন সভাপতি তফজ্জুল হক বৰবৰা, সদৌ অসম মইনা পাৰিজাতৰ সম্পাদক বীৰেন কলিতা সহ বহুকেইজন বিশিষ্ট সাহিত্যিক, সমাজকৰ্মী , সাহিত্যপ্ৰেমী ৰাইজ উপস্থিত থাকে

প্ৰতিযোগীতা মূলক শোভাযাত্ৰাত অংশগ্ৰহণ কৰিব পাৰিব জাতি, ধৰ্ম, বৰ্ণ, পন্থ ভাষা নিৰ্বিশেষে সকলোলোকে

গোলাঘাটৰ ঢুলীয়া গাওঁ বৰনামঘৰত জাতি, বৰ্ণ, ভাষা, পন্থ নিৰ্বিশেষে আয়োজন কৰা হৈছে-“অবিৰত শ্ৰীমদ্ভাগৱত পাঠ”। এই ভাগৱত পাঠ ১৫ মাৰ্চ, ২০২৫ৰ পৰা ২২ মাৰ্চ, ২০২৫ লৈকে অনুষ্ঠিত হ’ব।

গোলাঘাটৰ এজন বিশিষ্ট উদ্যোগপতি, সমাজসেৱক শ্ৰীযুত সঞ্জীৱ গগৈয়ে স্থানীয় বিভিন্ন ধৰ্মাৱলম্বী ৰাইজৰ সহযোগত এনেদৰে বিগত দহটা বছৰ এই অনুষ্ঠানটি আয়োজন কৰি আহিছে। এই “অবিৰত ভাগৱত পাঠ” অনুষ্ঠানটোৰ অন্ত পৰিব ২২ মাৰ্চত। সামৰণি অনুষ্ঠানৰ সন্ধিয়া সদৌ অসম ভাওনা প্ৰতিযোগিতাত শ্ৰেষ্ঠ স্থানপ্ৰাপ্ত শিশু ভাওনা দল মুকুন্দ মুৰাৰী নাট্যগোষ্ঠী (মৰঙী), গোলাঘাটৰ দ্বাৰা পৰিবেশিত হ’ব নাট -‘ধ্ৰুৱ চৰিত্ৰ’।

ভাগৱত পাঠৰ আৰম্ভণিৰ প্ৰথম দিনা ভাগৱত ভ্ৰমণ ও প্ৰতিযোগীতা মূলক শোভা যাত্ৰাৰ আয়োজন কৰা হৈছে। সেই উপলক্ষে সকলোকে নিমন্ত্ৰণ জনোৱাৰ লগতে প্ৰতিযোগীতা মূলক শোভা যাত্ৰাত জাতি, ধৰ্ম, বৰ্ণ, পন্থ ভাষা নিৰ্বিশেষে সকলো ইচ্ছুক প্ৰতিযোগীয়ে অংশ গ্ৰহণ কৰিব পাৰে। যোগাযোগৰ বাবে – ৭৮৯৬৪৯৬৭৫৫/ ৯৩৬৫৮৪০৩৪৮/ ৬০০১৮৪৫২৯০/ ৭৬৩৮০৫০৭০১ এই নম্বৰত।

আজি ইংৰাজী ২৭ ফেব্ৰুৱাৰী, ২০২৫ তাৰিখে গোলাঘাটৰ স্বাস্থ্য বিভাগে জিলা খনৰ মুঠ ১৬৮৩ জন যক্ষ্মা ৰোগীক পুষ্টিকৰ খাদ্যৰ টোপোলা বিতৰণৰ কাৰ্যক্ৰম অনুষ্ঠিত কৰে।

নুমলীগড় শোধনাগাৰৰ পৃষ্টপোষকতাত আৰু হৰে কৃষ্ণ মুভমেণ্টৰ সৌজন্যত আজিৰ এই কাৰ্যসূচী অনুষ্ঠিত হয়। গোলাঘাট স্বাস্থ্য বিভাগৰ ৰাষ্ট্ৰীয় যক্ষ্মা নিয়ন্ত্ৰণ কোষে নুমলীগড় শোধনাগাৰক আবেদন জনাই প্ৰতিষ্ঠানটোৰ চি.এছ.আৰ (CSR- Corporate Social Responsibility) কাৰ্যসূচীৰ অধীনত এই খাদ্যৰ টোপোলা বিতৰণ কাৰ্যসূচী ৰূপায়ন কৰে। আজিৰ অনুষ্ঠানত যক্ষ্মা ৰোগী সকলক পুষ্টিকৰ খাদ্য বিতৰণৰ উপৰি নিক্ষয় মিত্ৰ সকলক সম্বৰ্ধনা পত্ৰ আগবঢ়োৱা হয়।

ভাৰত চৰকাৰে যক্ষ্মামুক্ত ভাৰত কাৰ্যক্ৰমৰ অধীনত সমগ্ৰ দেশতে বহুখিনি কাৰ্যসূচী ৰূপায়ন কৰি আহিছে। মাননীয় প্ৰধানমন্ত্ৰী শ্ৰীযুত নৰেন্দ্ৰ মোদী ডাঙৰীয়াই ভাৰত বৰ্শক ২০২৫ চনৰ ভিতৰত যুক্ষ্মামুক্ত কৰাৰ সংকল্প গ্ৰহণ কৰিছে। উল্লেখনীয় যে ঔষধৰ লগতে পুষ্টিকৰ খাদ্য সেৱন কৰাটো এই ৰোগত অতিকৈ গুৰুত্বপূৰ্ণ যিহেতু শৰীৰত পৰ্যাপ্ত পুষ্টিৰ মাত্ৰা থাকিলেহে ৰোগীয়ে এই ৰোগক পৰাস্ত কৰিব পাৰে। শৰীৰৰ প্ৰতিৰোধ ক্ষমতা বঢ়াবৰ বাবে পৰ্যাপ্ত পুষ্টি লাভ কৰিলেহে টি.বি অথবা যক্ষ্মা ৰোগৰ পৰা সোনকালে পৰিত্ৰাণ পোৱাৰ সম্ভাৱনা থাকে। কিন্তু আৰ্থিক ভাবে দুৰ্বল ৰোগী সকলে পুষ্টিকৰ খাদ্যৰ অভাৱত এই ৰোগত বহু দিনলৈ ভুগি থাকি অৱশেষত মৃত্যুৰ মুখত পৰে। চৰকাৰী চিকিৎসালয়ত উপলব্ধ ঔষধ বিনামূলীয়া যদিও আৰ্থিক ভাবে দুৰ্বল পৰিয়াল এটায়ে পুষ্টিকৰ খাদ্য যোগাৰ কৰাৰ প্ৰচেষ্টাত অসফল হয় আৰু উপাইবিহিন হৈ ভাগি পৰে। তেনে স্থলত এজন ব্যক্তি অথবা অনুষ্ঠান/ প্ৰতিষ্ঠানে ‘নিক্ষয় মিত্ৰ’ হিচাপে পুষ্টিকৰ খাদ্য সামগ্ৰীৰে পৰিপূৰ্ণ খাদ্যৰ টোপোলা আগবঢ়াই যক্ষ্মাৰ বিৰুদ্ধে যুঁজ খনৰ অংশীদাৰ হৈ মানৱ সেৱাৰ এক উদাহৰণ দাঙি ধৰিব পাৰে।
এজন নিক্ষয় মিত্ৰই ৬ মাহলৈ এজন যক্ষ্মা ৰোগীৰ বাবে প্ৰত্যেক মাহত ১০০০/- টকা মূল্যৰ পুষ্টিকৰ খাদ্যৰ আগবঢ়াব পাৰিব।

আজিৰ অনুষ্ঠানত স্বাস্থ্য বিভাগৰ দায়িত্বত থকা অতিৰিক্ত উপায়ুক্ত শ্ৰীযুত জেমছ আইণ্ড, যুটীয়া স্বাস্থ্য সেৱা সঞ্চালক, ডা: ৰণজিত ভূঞা, মুখ্য চিকিৎসা আৰু স্বাস্থ্য বিষয়া, ডা: ভাৰত ফুকন, মহকুমা চিকিৎসা আৰু স্বাস্থ্য বিষয়া, ডা: ৰঞ্জিত হাজৰিকা, হৰে কৃষ্ণ মুভমেণ্টৰ মাতাজী নৱনিতা বৰুৱা, জিলা যক্ষ্মা বিষয়া, ডা: উৎপল বৰুৱা, চাৰিঙীয়া খণ্ড প্ৰাথমিক স্বাস্থ্য কেন্দ্ৰৰ ডা: দিলীপ ৰাজবংশী, জিলা অসামৰিক চিকিৎসালয়ৰ ডা: ৰবীন তামূলী, সমাজ

কল্যাণৰ লগত জৰিত বেচৰকাৰী সংস্থা সমূহ, ৰাষ্ট্ৰীয় স্বাস্থ্য অভিযান, গোলাঘাট গোটৰ বিষয়া সকল, টি বি বিভাগৰ বিষয়া – কৰ্মচাৰী, আশা কৰ্মী ইত্যাদি উপস্থিত থাকে।

গোলাঘাট জিলাৰ মুৰফুলনী খণ্ড বন কাৰ্য্যলয়ৰ খণ্ড বন বিসয়া বিপুল বৰগোহাঁই সহ এটা তহলদাৰী দলক আক্ৰমণ কৰে এজন শিল বালীৰ ব্যৱসায়ীয়ে। অভিযোগ অনুসৰি জনৈক ৰহমান উপাধিৰ লোক জনে অবৈধ ভাৱে মাটি খান্দি সৰবৰাহ কৰি থকাৰ সময়তে আক্ৰমণৰ লক্ষ্য কৰি লয় তহলদাৰী বনকৰ্মীৰ দলটোক । মাটি খান্দি সৰবৰাহ কৰি থকাৰ খবৰ পায় বুজ লবলৈ গৈছিল বনকৰ্মীৰ দলটোৱে।ব্যৱসায়ী জনৰ আক্ৰমণত মুৰফুলনী খণ্ড বন বিষয়া বিপুল বৰগোহাঁই আৰু বনকৰ্মী ৰামজিত দাসনামৰ দুজন বনকৰ্মী আহত হয়। ঘটনা সন্দৰ্ভত বন বিভাগে বগীজান আৰক্ষী থানাত গোচৰ ৰুজু কৰিছে।

ডিজিটেল সংবাদ, ১৯ ফেব্ৰুৱাৰী : মৰঙি প্ৰেছ ক্লাৱৰ উদ্যোগত , সামাজিক উন্নয়ন ফ’ৰাম আৰু মৰঙি মহাবিদ্যালয়ৰ সহযোগত মৰঙি মহাবিদ্যালয়ত যোৱা ১৭ আৰু ১৮ ফেব্ৰুৱাৰীত অনুষ্ঠিত হোৱা ছপা আৰু বৈদ্যুতিন মাধ্যমৰ দুদিনীয়া সাংবাদিকতাৰ কৰ্মশালা অনুষ্ঠিত হয়৷ অৰ্ধশতাধিক ছাত্ৰ – ছাত্ৰীৰ অংশগ্ৰহণৰে অনুষ্ঠিত কৰ্মশালাত আমাৰ অসম কাকতৰ উপ – সম্পাদক তথা স্বদেশ পটভূমিৰ মুখ্য সম্পাদক ৰবীন ভূঞাই সমল ব্যক্তি হিচাপে উপস্থিত থাকি ছপা মাধ্যমৰ সাংবাদিকতা, লিখন শৈলীৰ ওপৰত বস্তুনিষ্ঠ প্ৰশিক্ষণ প্ৰদান কৰে৷ আনহাতে ১৮ ফেব্ৰুৱাৰীত প্ৰতিদিন টাইমৰ জ্যেষ্ঠ

সাংবাদিক জিতুল দত্তই বৈদ্যুতিন মাধ্যমৰ সাংবাদিকতাৰ সম্পৰ্কত বস্তুনিষ্ঠ প্ৰশিক্ষণ প্ৰদান কৰি শিক্ষাৰ্থী সকলক সাংবাদিকতাৰ প্ৰত্যাহ্বানমুলক বৃত্তিৰ সম্পৰ্কত বহুল বাখ্যা দাঙি ধৰি প্ৰশিক্ষণ প্ৰদান কৰে৷ কালি কৰ্মশালাৰ অন্তত আজি মৰঙি মহাবিদ্যালয়ত সাংবাদিকতা কৰ্মশালাৰ সামৰণি আৰু মৰঙি প্ৰেছ ক্লাৱৰ প্ৰাক্তন সম্পাদক প্ৰিয়ংদ্বীপ কাকতিলৈ বিদায় সম্বৰ্দ্ধনা উপলক্ষে এক সভাৰ আয়োজন কৰা হয়৷ মৰঙি মহাবিদ্যালয় প্ৰেক্ষাগৃহত অনুষ্ঠিত কৰ্মশালাৰ সামৰণি তথা বিদায় সভাখনত আদৰণি ভাষণ আগবঢ়ায় মৰঙি প্ৰেছ ক্লাৱৰ সভাপতি হেমন্ত শইকীয়াই৷ শইকীয়াই ১৯৯৭ চনৰে পৰা সাংবাদিকতাৰ ক্ষেত্ৰখনত প্ৰিয়ংদ্বীপ কাকতিৰ সৈতে একেলগে সেৱা আগবঢ়াই অহা দিনবোৰৰ কথা সোঁৱৰি আৱেগিক হৈ উঠে৷ সাংবাদিকতাৰ কৰ্মশালাৰ সামৰণি আৰু প্ৰিয়ংদ্বীপ কাকতিৰ বিদায়

সম্বৰ্দ্ধনা অনুষ্ঠানটিৰ উদ্বোধন কৰে মৰঙি মহাবিদ্যালয়ৰ অধ্যক্ষা ড° মামনি মহন্তই৷ সভাত নিৰ্দিষ্ট বক্তাৰূপে উপস্থিত থাকি চৰকাৰী আদৰ্শ মহাবিদ্যালয়, দেইথৰৰ অধ্যক্ষ ড° দীপক বৰাই কয় যে সাংবাদিকতাৰ ক্ষেত্ৰখনত নিৰপেক্ষতাৰ কথাটো প্ৰায় অমূলক৷ সংবাদদাতাসকলৰ সত্যৰ পক্ষত অৱস্থান কৰা উচিত৷ ড° বৰাই বিদায়ী সাংবাদিক প্ৰিয়ংদ্বীপ কাকতিৰ সমাজ জীৱনতো আলোকপাত কৰি কয় যে কাকতিৰ দৰে নান্দনিক মননৰ ব্যক্তিজনৰ প্ৰচেষ্টাতে মৰঙি প্ৰেছ ক্লাৱে এক নতুন বাটেৰে বাট বুলিবলৈ সক্ষম হৈছে৷ মৰঙি প্ৰেছ ক্লাৱে এজন সতীৰ্থক বিদায় দিবলৈ যি আয়োজন কৰিছে, তাৰ শলাগ লৈ আপকুৰ কেন্দ্ৰীয় সম্পাদক প্ৰণৱ চক্ৰৱৰ্তীয়ে কয় যে প্ৰিয়ংদ্বীপ কাকতিয়ে সাংবাদিকতাৰ জড়িয়তেই মৰঙিৰ লগতে গোটেই জিলাখনৰ সমাজ জীৱনকে এক নান্দনিক দিশ দেখুৱাবলৈ সক্ষম হৈছিল৷

চক্ৰৱৰ্তীয়ে লগতে অসমৰ সংবাদকৰ্মীসকলৰ সংগ্ৰামৰ বিষয়েও উল্লেখ কৰি কয় যে অতি দ্ৰুত সেৱা হিচাপে চিহ্নিত ১০৮ মৃত্যুঞ্জয়ৰ বাহন ঘটনাস্থলীত উপস্থিত হোৱাৰ পূৰ্বেই ঘটনাস্থলীত সংবাদকৰ্মীসকল উপস্থিত হ’বগৈ লাগে৷ কিন্তু অসমত সাংবাদিকৰ পাৰিশ্ৰমিক একেবাৰে নগণ্য৷ সংবাদকৰ্মীসকলৰ পাৰিশ্ৰমিকৰ বিষয়টোত চৰকাৰে সুনিৰ্দিষ্ট নীতি-নিৰ্দেশনা প্ৰস্তুত কৰাটো সময়ৰ আহ্বান বুলি তেওঁ কয়৷ শিক্ষক, সাহিত্যিক জিতেন কুমাৰ হাজৰিকাই কয় যে মানুহৰ বাবে কিবা এটা কৰাৰ সপোনেই প্ৰিয়ংদ্বীপ কাকতিক বিশেষ কৰি গঢ়িছে৷ পৰিশীলিত আৰু শৈল্পীক জীৱনৰ উৎকৃষ্ট নিদৰ্শন প্ৰিয়ংদ্বীপ কাকতি৷ মানুহ আৰু সমাজেই তেওঁক সাংবাদিকতাৰ ক্ষেত্ৰখনৰ পৰা আন এখন জটিল ক্ষেত্ৰলৈ যাবলৈ প্ৰেৰিত কৰিছে বুলি মন্তব্য কৰে জিতেন কুমাৰ হাজৰিকাই৷ নুমলীগড় শোধনাগাৰৰ মহাপ্ৰবন্ধক মিণ্টু সন্দিকৈয়ে প্ৰিয়ংদ্বীপ কাকতিৰ প্ৰশংসা কৰি কয় যে তথ্য সংগ্ৰহ আৰু সংৰক্ষণত ক্ষেত্ৰত প্ৰিয়ংদ্বীপ কাকতি অনন্য৷ সমাজৰ বাবে এটা অৰ্থনৈতিক মডেলো প্ৰিয়ংদ্বীপে আগবঢ়াই দিবলৈ সক্ষম হৈছে৷ সম্বৰ্দ্ধনাৰ অন্তত নিজা বক্তব্যত মৰঙি প্ৰেছ ক্লাৱৰ প্ৰাক্তন সম্পাদক তথা সমাজকৰ্মী প্ৰিয়ংদ্বীপ কাকতিয়ে সকলোৰে প্ৰতি কৃতজ্ঞতা প্ৰকাশ কৰি কয় যে যি সময়ত মৰঙিলৈ দৈনিক কাকতেই বিশেষ অহা নাছিল, সেই সময়তে তেওঁ সাংবাদিকতাৰ ক্ষেত্ৰখনত খোজ পেলাইছিল৷ মানুহৰ বাবে কাম কৰিবলৈ যাওঁতে সমালোচনাক নতশিৰে গ্ৰহণ কৰি আপোচবিহীনভাবে নিজৰ বাটত আগবাঢ়ি যাবলৈ শিকিছে বুলিও উল্লেখ কৰে মৰঙি প্ৰেছ ক্লাৱৰ বিদায়ী সম্পাদকজনে৷ তেওঁ কয় যে সাংবাদিকসকলে সদায় সমস্যাসমূহৰ কথাহে ক’ব পাৰে৷ তাৰ সমাধানৰ বাবে যি ৰাজনৈতিক সদ্দিচ্ছাৰ প্ৰয়োজন, তাৰ সন্ধানতে তেওঁ আন এখন ক্ষেত্ৰলৈ যাত্ৰা কৰিছে৷ উল্লেখ কৰিব পাৰি যে প্ৰিয়ংদ্বীপ কাকতিয়ে শেহতীয়াকৈ ৰাজনীতিৰ ক্ষেত্ৰখনত ভৰি থোৱাৰ বাবে সাংবাদিকতাৰ ক্ষেত্ৰৰ পৰা অব্যাহতি লৈছে৷ সাংবাদিকতাৰ কৰ্মশালাত অংশ লোৱা

ছাত্ৰছাত্ৰীসকলকো আজিৰ সভাত বিশেষ প্ৰমাণপত্ৰও প্ৰদান কৰা হয়৷ লেখক, সাংবাদিক, কবি দীপক বৰাই আঁতধৰা সভাৰ সমবেত সংগীত পৰিবেশনৰে সভাৰ শুভাৰম্ভনী কৰে দৈগ্ৰোঙৰ প্ৰগতি মহিলা সমিতিয়ে৷ মৰঙিৰ সকলো ক্ষেত্ৰৰ বিশিষ্ট ব্যক্তিসকলৰ লগতে বহুকেইজন বিশিষ্ট শিক্ষাবিদ, লেখক, সাহিত্যিক , সমাজকৰ্মীৰ উপস্থিতি আছিল লক্ষণীয়৷

মৰঙি ডিজিটেল সংবাদ ১৮ ফেব্ৰুৱাৰী : মহাপুৰুষ শ্রীমন্ত শঙ্কৰদেৱৰ উদাৰ মানৱতাবাদী আধ্যাত্মিক দর্শনৰ ভেটিত প্রতিষ্ঠিত ভাৰতবৰ্ষৰ ধর্ম-সাহিত্য-সংস্কৃতিৰ সুবৃহৎ গণতান্ত্রিক অনুষ্ঠান শ্রীমন্ত শঙ্কৰদেৱ সংঘৰ ২৭ টা জাতি-জনগোষ্ঠীৰ লোকেৰে সংপৃক্ত হৈ গুৰুজনাৰ আদর্শেৰে উচ্চ-নীচহীন, জাতি-ভেদহীন সুন্দৰ সমাজ গঠন কৰি অসমৰ জাতীয় জীৱন উজ্জীৱিত কৰি ৰাখি বিশ্বসমাদৃত জাতীয় অনুষ্ঠানলৈ পর্যবসিত হৈছে। যোৱা ১৭ ফেব্ৰুৱাৰীত সোণাৰিত টাই আহোম যুৱ পৰিষদ অসম বা চমুকৈ টাইপাৰ কেইজনমান কর্মকর্তাই সংগঠনটোৰ বেনাৰত প্ৰতিবাদৰ নামত শ্রীমন্ত শঙ্কৰদেৱ সংঘৰ প্রতীকচিহ্ন আৰু সংবিধানৰ

প্রতিলিপি দাহ কৰাত ক্ষুণ্ণ হৈ পৰিছে সংঘ। তাৰ প্ৰতিক্ৰিয়া হিচাপে আজি তেওঁলোকৰ বিৰুদ্ধে সমগ্ৰ অসমতে থানাই থানাই গোচৰ ৰুজু কৰিছে শ্ৰীমন্ত শঙ্কৰদেৱ সংঘৰ তৰফৰ পৰা। তাৰ সমান্তৰালকৈ মৰঙি মৌজাৰ নুমলীগড় গ্ৰাম্য আৰক্ষী থানা আৰু বগীজান আৰক্ষী থানাতো সংঘৰ মৰঙি আঞ্চলিকে এজাহাৰ দাখিল কৰে।

উল্লেখ্য যে যোৱা ৩১ জানুৱাৰীৰ মে-ডাম মেফিৰ মাংগলিক অনুষ্ঠানত শঙ্কৰদেৱ সংঘৰ এজন সদস্যই অংশগ্ৰহণ কৰা বাবেই এই বিতৰ্কৰ সৃষ্টি হৈছিল আৰু তাৰ পৰিপ্ৰেক্ষিতত গোটেই অসমতে সৃষ্টি হোৱা প্ৰতিক্ৰিয়া আজিও অব্যাহত আছে৷